Welcome Guest Login

sang jab aa inaa dikhaataa hai

sang jab aa_iinaa dikhaataa hai
teshaa kyaa kyaa nazar churaataa hai

sil_silaa pyaas kaa bataataa hai
pyaas dariyaa kahaa.N bujhaataa hai

raig-zaro.n me.n jaise tapatii dhuup
yuu.N bhii us kaa Khayaal aataa hai

sun rahaa huu.N Khiraam-e-umr kii chaap
aks aavaaz banataa jaataa hai

vo bhii kyaa shaKhs hai ke paas aa kar
faasale duur tak bichhaataa hai

ghar to aisaa kahaa.N thaa lekin
dar-badar hai.n to yaad aataa hai.

Submit Your Poetry

by:- admin posted in:- umeed fazli

Comments are closed. :(