Welcome Guest Login

husn jab meharbaan ho to kyaa kijiye

husn jab meharbaa.N ho to kyaa kiijiye
ishq kii maGfirat kii duaa kiijiye

is saliiqe se un se gilaa kiijiye
jab gilaa kijiye ha.Ns diyaa kiijiye

duusaro.n pe agar tabsiiraa kiijiye
saamane aa_iinaa rakh liyaa kiijiye

aap sukh se hai.n tark-e-ta"alluq ke baad
itanii jaldii na ye faisalaa kiijiye

ko_ii dhokhaa na khaa jaaye merii tarah
aise khul ke na sab se milaa kiijiye

aql-o-dil apanii apanii kahe.n jab "Khumar"
aql kii suniye dil kaa kahaa kiijiye .

Submit Your Poetry

by:- admin posted in:- khumar barabankvi

Comments are closed. :(