Welcome Guest Login

ham unhen vo hamen bhulaa baithe

ham unhe.n vo hame.n bhulaa baiThe
do gunah_gaar zahar khaa baiThe

haal-e-Gam kah kah ke Gam ba.Dhaa baiThe
tiir maare the tiir khaa baiThe

aa.Ndhiyo.n jaao ab aaraam karo
ham Khud apanaaa diyaa bujhaa baiThe

jii to halkaa huaa magar yaaro
ro ke ham lutf-e-Gam ba.Dhaa baiThe

besahaaro.n kaa hausalaa hii kyaa
ghar me.n ghabaraaye dar pe aa baiThe

jab se bichha.De vo muskuraaye na ham
sab ne chhe.Daa to lab hilaa baiThe

ham rahe mubtalaa-e-dair-o-haram
vo dabe paao.N dil me.n aa baiThe

uTh ke ik bevafaa ne de dii jaan
rah gaye saare baavafaa baiThe

hashr kaa din hai abhii duur "Khumar"
aap kyo.n zaahido.n me.n jaa baiThe .

Submit Your Poetry

by:- admin posted in:- khumar barabankvi

Comments are closed. :(